Pai pa los añus finalis de los 70, s´empadronó p´al Caminu dela Virgin un moçinu güenu mejol un  jombri que se jiçu noviu dela ” Jujú”, un adefesiu de mujel, fea como un trapu llenu de cocus, conos dientis desapartaus i pochus,  la probi tuvu un mal acabaeru, peru las cosas del querel son asina i comu son asina, pos asina mesmu vos las cuentu.

      Esti enchambaol venía de pa las tierras de Alcántara peru no sabemus mu bien dondi abía siu la su nacencia, si de los Estorninus o Piedras Albas o sabi dios dondi. Esti tenía tamién mu mal pelistaqui, feu peru feu de tres paris de c………, peru la su labia era comu la d´un letrau, era delo más rechumplosu, era escapá de vendel tratoris po docenas, televisoris pol cientus, leña po milis, o lo que jiciera falta con tal de sacal güenus quartus. Estu no es nenguna contrariedá a que no?, el matamueru andaba que no tenía ná de to lo vendíu i engatusaba a las presonas conel su dicharacheru i jaciendusi con las perrinas que afiaban pal compriju, escabulliendusi endispués de jacel el entuertu.

      Tieni muchisías pirugas, peru sos vi a cuentar la de los televisoris en el puebru del lagartu:

-Aquí se jiçu pasal po un ténicu letronicu d´esus cacharrus ondi se vían las corrías de torus i el furbol de tos los sitius con toa clariá, teniendu en cuenta que enesus tiempus en Coria si querías vel una corría de torus la genti se cogía el cochi i se iba a Portaji pa vela, pos aquí el repetiol de Montanchis no mandaba un güen avistamentu. Pos velaí que esti bandoleru se jiçu pasal po tenicu de Jose Luis Panaeru que pa entoncis era un estalachi de los mejoris en toa la provincia i vendió desus televisoris enuna casa sí i la otra tamién el mejol de tos los televisoris en colol reçién saliu al mercau d´aquellus telefunquin…… El dolondongón le vinu endispués al comerciu del Jose Luis Panaeru i a vel de que guissa daba el esplicaeru d´esus aconteceris.

!Pa otra si me arrecuerdu sos cuentu el del deínu

pa siguil recebiendu el pagamientu del su agüelinu!.