Di con el allascu d´esta afotu por estus loberiis del feisbu jaci unus días i trai al rescati la imagi tan propia en España comu en otrus lugaris tamién mediterranius de comu era la vía al prencipiu del sigru XIX, aparecía a la de agora con angunus cambius. La vestimienta o jatus, la partía de naipis del café en la mesma calli i losotrus jombris de mirandiqui, el sol refrejau en la fachá, la mocina ansomá dendi el su balcón, la muger con el cántaru d´agua traía del cañu de las cuatru callis, con el tranquiju sin ruíus ni bullieru de cochis…..menú sosiegu.

      Lástima que se escabullin en el tiempu, menus mal que a vecis tenemus esas recordaeras asina, en los santus que salin de las redis socialis.

      Emprencipius de sigru XIX, los baris eran pa los obrerus i los cafés pa la éliti, esa deferencia a siu jasta jaci mu pocu i asín lo puein recuerdar los más maioris. Me creu i es comu ná que esi Café de la Praça i por los jatus de las presonas que andan pallí, jueran solamenti pa las más acendás de Coria i angún que sotru vesitanti, de jechu en la mesma Praça esistía el Exprés, que pa entoncis era el Baili escrusivu de esa éliti que era lo más de lo más de Coria.