PARODIA DE TRUMP Y PUTIN | Palramus extremeñu - Blogs hoy.es

OSCEC — Thu, 20 Mar 2025 11:50:47 +0000

Úrtima ora del caraveu entri Tram i Putin

Soniquea el timbri d´un telefonu nel Krenlin, rriiinnnggg rriinngg rriinngg, el Putin que l´echa la manu pa contestal. De tos es sabíu que era Tram, po lo andaba buscandu p´arreparal esu de la Ucrania. Escomienza la convessación:

– Putin: Ola güenas tardis Tram, tas puestu las pilas?

– Tram: Ola Putin, pos craru que sí tu bien sabis que dendi pol l´amañana tengu cargá toa al radiativiá nel cuerpu. Es pol esu que a vecis se me poni to pelijincau el flequillu.

– Putin: Amus a palral n´estremeñu que asina t´efiendis mejol, pos el rusu no se ta dau enjamás bien.

– Tram: D´acuerdu Putin mejol asín, que los estremeñus comu andan d´emigrantis en tos laus lo entiendin mejol.

– Putin: Amus allá, dimi lo que quieris i mos dejamus d´arrodeus.

– Tram: Posi, era mester que l´Ucrania, jicieramus el repartiju pa dambus i pa esu emus acuerdau esta llamá. Asina que si andamus d´acuerdu mos atenemus a los jechus i tú te queas con las tierras que tienis invaías i pa mi las tierras raras, que comu son tan raras pos no las quierin en menguna parti.

– Putin: Achooo, no creis que vas mu deprisa pal repartiju esi, es que yo tamién quieru que dejis de dalli ayuás nel armamentu i esu de la enteligencia pa que nusotrus, ya pa más alantri no digu agora mesmu noo, es pa no tenel nenguna resistencia si tenemus que golvel a envadíl.

– Tram: Pos craru, esu está echu. Peru vamus a vel que te paeci lo de Groenlandia pos comu andamus arreparandu esti mundu, estaría mu güenu que tamién nos cogieramus esus territorius perdius de la manu de Dios i le dieramus un güen avíu, quieris que agamus otru repartiju paqui?, ya que andamus nestus andurrialis, no te paeci?

– Putin: Pos me paeci bien, tengu unas güenas ganinas d´esi archipiélagu i si a ti te vieni mejol Groenlandia pos asina mesmu lo dejamus.

– Tram: Fabulosu, eris el putu amu….jejeje por esu t´almientas el Putin.

– Putin: Achoo, ten cuidaínu no m´escabreis que no me peta ná que m´escaldin pa que aluegu me pongan comun pingu, asina que ponti atranquiju.

– Tram: Jo achoo no almitis una groma, anda vamus a echal unas risinas que estu no tieni negún empedimentu….( se juman un peta, Tram conun güen vasinu de güisqui i el Putin conun vodca en las manus, mu aparentis dambus). Se riin jasta de la su sombra de Méssicu, de Panamá, de Canadá i del chinu i del coreanu i de tós los que esperamus el altu el fuegu, mentras que andan conos preparus desotra guerra nel mundu…Disque pa ponel ordin.

– Putin: Que bien sienta estu peru a lo que vamus que entovía no emus acabau i tenemus que tenel un güen acabaeru i en condicionis. Asina que te piu la revancha del partidu de Joqui sobre el jielu del añu 1980 i vos tenemus que ganal, peru esu si vamus a comel amburguesas i costillaris a la bravacoa comu si hueramus americanus, asin que si me icis que sí, lo queamus to compuestu dendi esti precisu estanti.

– Tram: Peru mos hazi falta lo más prencipal que es dejal un cachinu tregua pa que Celesqui i los Uropeus tamién salgan airosus.

– Putin: N´esu no tengu reparu nengunu le damus tregua i angunus soldaus que tenemus jeríus i ellus que me den tos los que tienin enchiuronaus.

– Tram: Tengu que palral con Celesqui i veremus si no se poni a tiru, porque si no mos lo quitamus denmediu i ponemus unu de los nuestrus i sansacabó.

– Putin: Perfetu mingarrón, eris mu amañosu i tienis güen tranci.

– Tram: No me joas la pavana, a vel si las vamus a tenel entri amegus.

CONCRUSIÓN: Cá unu va a lo suyu i a los demás que los joan pa vinu, que con tós esus gallaretis mandamasis del mundu mundial no ai quien se meta. Acabu cona recordaera de Paul Valéry, “La guerra es una masacri entri gentis que no se conocin pal provechu de gentis que sí se conocin peru que no s´escabechan”.

Jaime Gilmart

Coria