LOS 7 MANÍFICUS

       Es mu ifici que sos acuerdéis d´estu, porque ni en siquiera yo mesmu pudi vel-lu pos tovía andaba enas escuelinas nacionalis pol antoncis. Velaí, que unus cuantus añus más tardi del sigru pasau pos me huí a hazel los estudius del bachillel a los Cácris i enos domingus n´abía na más que fubu, cinis i paseus, solamenti que pol vel las moçinas de l´universiá pai nel paseu de Cánovas i la calli Pintoris o pal Gran Teatru, peru amus que yo pa esus días no sabía ni paqué, a lo que vamus que se pierdi unu cuentandu cosinas que no vienin al cuentu.

       Pos que enchegandu unu d´esus domingus el partíu de fubu que se juegaba hué precissamenti el Cacereñu conel Badajó nel campu de fubu de la Ciuá Deportiva i pos comu n´abía mejol plan pos nos pusimus piés en polvorosa i caminu p´arribota asta chegal al campu assitiau p´al rodeu, el día andaba un poquinu nublau peru enjamás creímus que endispués se pusiera tan tormentosu asina que d´enseguía salierun las gestas de partíus groriosus nesus días d´aiguas i barrus. Asína hué comu me queé embobau cuandu aquel señol al laínu nuestru cuentaba al su acompañanti la susodicha epopeya i que agora vos pasu a cuental.

       Referimientu del partiu esti: 

       Añu del 1964 i primel día del mes de marçu, el partíu era mu parecíu al que andabamus viendu pos eran de la más grandi rivaliá entri los equipus estremeñus, na más i ná menus que las ciuais más grandis de toa Estremaúra, pol antoncis el genteríu enos campus era bastanti numerosu i más nun partíu comu esti ondi los nervius salían a floti a la más mínima ena qu´el arbitru diera el pitiu a favol de los visitantis, se liaba una más grandi que una tormenta con truenus i relámpagus, esti arbitru tuvu demasiau protagonismu dendi el prencipiu mesmu peru el Cacereñu mu arropau pol la su afición d´enseguía hué poniendu en su sitiu a los blanquinegrus, los graeríus cá ves más animosus conos sus jugaoris i los pitius al de negru tamién subían de los decibelius, estaba craru que pitaba con muchu tratu de favol a los sus vecinus, pos era meritensi, peru asín i to los verdis en la media ora de juegu ya l´abían marcau 2 golis a los blanquinegrus mu a pesal del arbitragi que cá ves se hazía más descarau conos sus pitíus sempri a favol de los pacensis. Las gradas repletas de aficionaus cacereñus respingaban indinaus pol esi atrevimientu nel su propiu campu i el jombri de negru ná más conel silbatu ena boca to el tiempu ena contra de los localis i a esu del minutu 35 el Badajó marcó un gol que no debió abel subíu al marcadol i estu pusu a toa la afición de los nervius, igualmenti que a los mesmus jugaoris del cacereñu que huerun a pol el arbitru haziendu un corru alrreol suyu al laínu mesmu del tunil de vestuarius. Nesta tangana al de negru se le ocurri ná más que sacal-li la targeta roja i d´una tajá a 4 del cacereñu lo cual pusu las gradas patas arriba i s´armó la revolución, una bronca bochornosa qu´enjamás tenía que pasal enos campus de fubu, peru ya s´abía echu tardi i nesas andabamus cuandu un jugaol del cacereñu el Ibarreche le dió un çacapuñu a García Camarero que asina s´almientaba el arbitru que lo dejó sin sentíu i pocu dispués el partiu quea suspendíu i al Ibarreche le ponin de suspensu 17 partius. Pos conesti resultau de 2-1 s´acaba el partiu que se güelvi a acontinual el día 12 del mesmu mes de março.

       Hué esti día 12 de março cuandu toa la afición del cacereñu enllenó las gradas del campu asta revental-lu i con más ganas de jarana pos queaban entovía los 10 minutus del primel tiempu i to el segundu, recuerdandu que ná más abía que 7 jugaoris pos los otrus 4 quearun espulsaus. El día era mu tormentosu, agua a chorrus i el campu embarrau del tó, pos los campus regionalis eran de tierra.

       Se presenta el equipu con los 7 jugaoris i pa más inri los 2 porterus s´abían lesionau i asina que tuvun que ponel un defensa ena portería, la alinación era la siguienti: Palma, Valero, Moscoso, Cantalapiedra, Mandés, Tate i Monasterio. Se disputó esti con muchu morbu i es pol esu que el campu i los graderíus s´enllenarun a pesal de la torrencial lluvia i el resultau hué de 3-3 un empati que supu a groria vistu lo vistu i pasandu a la istoria de Cácris conel nombri de !LOS 7 MANÍFICUS!.

Jaime Gilmart

Coria