Ursulina i Pacu

Voi acontarsus un casu curiosu

que pa muchus puei sel provechosu

 Ursulina i Paco que s´adoraban

 p´al matrimoniu goras le faltaban

pocus días antis con gran embelesu  

Ursulina i Paco.. mmmm…se dierun un besu      

peru ella al besalu le diju al su Pacu

! Iju comu te güeli la boca a tabacu

 si no dejas el cebiqui malditu 

pos no nos casamus queríu paquitu.

Dendi aquel antoncis dejó Paco el viciu

jaciendu al dejalu un grandi sacrificiu

trunfó la coiunda de la nicotina

i al final s´ensartarun Paco i la Ursulina.

El día de la boa, naturalmenti

ubu cuchipanda i baili comu es consiguienti

terminau el baili, Paco, al momentu

se chevó a Ursulina pal su aposentu

i ella esperandu que él jiciesi o dijesi

pos anguna cosina, peru el tunanti de Pacu

se jizu el distraiu i  mu projundamenti se queó dormíu,

Ursula a Paquitu, no le diju na d´aquella conduta tan inesperá,

pensandu que el probi s´abía cansau

manque no era propiu de recién casau.

Pasó la semana sin que Paco le diera a su linda mujel ni un besinu siquiá

ni de de jaceli un mimu, Paco s´arrecordaba

ni tampocu Ursula se lo insinuaba

porque no es corragiosu que nenguna esposa 

deji de sel sempri decenti i pudurosa

más d´aquella suerti se cansó de fiju

i una nochi Ursula asina le diju:

Que ta pasau Paco, te notu mu tristi  

es  que de casau ya t´arrepentisiti.

I el mu frescu de Paco, se jacía el dormiu 

contestánduli con angún ronquíu.

Anti tal frascassu, la  Ursula a la su mairi le jué a cuentarli el casu

i la suegra vinu i al yernu i le diju:

Ascuchame Franciscu, quieris indicalmi inmediatamenti

el porqué la mi ija te es idiferenti…

¿ Qué acasu no sabis de tou casau las obrigacionis?…

…Sí lo sé señora,…esu s´endivina…

peru d´estu la culpabli es la Ursulina….

ella ma prebíu que jumasi

i sin tabaco soi jombri perdíu

no pueu ni animarmi, no tengu riañus….

La mairi i la ija dejarun a Paco

i a la toa mecha se juerun a mercar tabaco

i entri picaúras, cigarrillus i purus

se gastarun más de cientu treinta i tantus durus….

i dendi esi mesmu momentu que chegó el tabaco,

escomençó el goçu de la Ursulina i Paco.

Ursula que cá veci  que un puru Paco se jumaba,

d´un nuevu  deleiti Ursula desfrutaba….

I tos felicis i tos contentus

eran un modelu de esposus.

A los pocus días d´esa nueva dicha

a la su mairi juerun de visita…      

Que al vel a los sus ijus tan contentus, la mairi le diju:

¿ Qué si acasu ija mía la conduta que vía en Paco era tan solu debía al tabaco?

Esu era solamenti mairi idolatrá…

Agora si mamita no me falta de ná……

Cá veci q´un puru se juma el mi maríu, cólmame de alagus mu agraecíu.

I si un puru se juma el mi maríu,

no  ai un jombri más güenu i más generosu 

ya no pasu penas, ya no pasu apurus

mesmameti oi ya sa jumau decisieti purus.

Don Juan Regaredo padri de Ursulina 

que nunca enjamás abía jumau ni una tagartina,

i comu la envidia es mu cochina 

pos la viejina quisu sabel si el tabaco 

le jaría el mesmu efetu que a Paco.

Asina que le diju: Porqué Regaredo no te jumas unus cuantus purus….

Te notu tan tristi, tan retraíu…tan desamorosu

que a lo mejol el geniu se te levanta

 i que el tabaco te sirva comu estimulanti.

Don Juan Regaredo repió al instanti

poniendu en el su dichu muchu sentimientu.

..no creas adorá mujel mía que a mi el tabaco 

me jaga el mesmu efetu que a Paco….

el geniu míu, ya no ai quién lo levanti 

ni manque me jumasi compreta la isla de Cuba…