ÁBALOS I LA AUDENCIA SUPREMA

      Abalos se quea solu anti el Supremu. Dicin los refranerus que el “Buei solu bien se lambi”, peru me creu que cuandu esti mira al su collaçu de parranda, de rioju, sí esi mesmu que andas pensandu el remocotúu Koldo, le está iciendu conel su silenciu que entri bueis no ai cornás.

      A los letraus les da una patá a ca unu pol que no tieni fe i se sienti indefensu. Ellus, los letraus siguin ena sala i esu que se miran de ves en cuandu a caraperru, peru ná más pa vel que ici el autu del Señol Puenti el jues del Supremu.

      El señol diputau que entovía lo es Ábalos, se reguñi conel jues, ici que no es fraudi de lei esi assuntu de no tomal-si alargas cono sus abogaus i la descusión se bombea demassiau asina qu´el Señol Puenti, jues del Supremu le jaci esa ossservancia de que no anda p´al Congresu i que s´andi con muchu cudiau…. Estus son tos mu listus i se las sabin toas.

      La fiscalía afía que no essesti riegu pa que se fugui , no ai cambius ena cercustancias ni tampocu ena ultimación de los enformis i es po lo que no pii prisión, tampocu lo jaci el Señol Puenti peru le sali de oju i tantu que siga siendu diputau. 

      El puebru en cambiu sí que sabi mu bien lo que quieri. Prisión manque sea provisional i apalancal 650.000 €. El puebru es mu sabiu, que no listu.

      Una recordaera ná más. Los bueis son torus castraus en cuantis chegan a la madurés sessual, de sobra sabemus que dambus no an siu castraus pos andarun de puterius en puterius mentris que repartían chistorras.

Jaime Gilmart

Coria