CELEBRANDU LA LETTRATURA ENAS NUESTRAS LENGUAS

      Ayer sábau se celebró el día de las Letras Estremeñas en Guareña, ogañu dedicá a Luis Chamizo, en la que s´a revindicau con más huerza que nunca el valoreu de la nuestra letratura i que cona Assoçación Luis Chamizo i OSCEC s´a rendíu el debíu omenagi a tan insigni pueta.

      A siu mu pracenteru esti día, con una güena tupa d´emocionis nel recorriu leterariu pol las sus callis llenas de memoria. Dendi jaci más de 100 añus jué pubricau esi “Miajón de los Castúos” peru no sa olviau al iju del tinajeru porque enas escuelas de Guareña tos los neñus recitaban la Nacencia; tenemus los estremeñus que jacel to lo possibli pa que las estitucionis de la nuestra Comuniá Utónomica jagan valel enas escuelas i enos estitutos pa que tos los librus n´estremeñu sean estudiaus comu es debíu, es un recramu que no solu OSCEC jaci, tamién las Assoçacionis i aquellus que s´an deicau a la educación desafían pa que sean presenterus.

      Ubu mu güena genti en toas las mesas reondas, hormás en tornu sempri a las letras estremeñas i toas ellas resaltarun esa falta i que a los dagalis no les enseñin entovía ná del estremeñu o el castúo. Tenemus muchus librinus canteaus p´al estremeñu, cuentus, puesías, etc…..a qué andamus esperandu?. 

      La su nieta que pol cercustancias enjamás vivió en Estremaúra, arrecalcó tamién ena deuda que se tieni cona figura del su agüelu. A donau a Guareña algu mu íntimu i pressonal de la su familia con dibujus d´acuarela, regalu del agüelu a la su mairi, esas cosinas duelin nel alma desprendelsi d´ellas. Palrandu con  Victoria Díez Chamizo ( nieta) me diju assina:

     .-Na más pueu sentilmi ergullosa, mu ergullosa de to lo que se vieni jaciendu dendi OSCEC dandu esus arrempujonis pa que la nuestra luenga ocupi el su sitiu, huera aparti de las emocionis i esus sentiris del puebru pol Luis Chamizo. 

      .-En cuantu a esi legau me diju que era parti de su vía i la de la su familia, peru que sentía que esi era el mejol sitiu i mu seguru que Chamizo anda alvorotau de contentu dejandulu nel su puebru. 

      !AGRAECÍUS ANDAMUS TOS LOS ESTREMEÑUS I DENDI OSCEC MÁS ENTOVÍA CONA FAMILIA CHAMIZO I ESI MIAJÓN QUE MOS DEJÓ PREPETU! 

Jaime GilMart

Coria